Presidenti i Italisë, Sergio Mattarella, ka nënvizuar rëndësinë e pranisë së KFOR-it në Kosovë, duke theksuar se ky mision ka qenë jetik për të parandaluar shpërthime të dhunshme që mund të kishin shkatërruar rajonin.

Gjatë një ceremonie me komandën e misionit italian të KFOR-it në Kosovë, Mattarella vlerësoi angazhimin e trupave për 25 vite në garantimin e sigurisë dhe stabilitetit në Ballkan. Ai paralajmëroi gjithashtu për rrezikun e ndërhyrjeve të jashtme në rajon, duke theksuar nevojën për qetësi dhe bashkëpunim për integrimin e Ballkanit në Bashkimin Europian.

“Prania e KFOR-it është e domosdoshme. Klima lokale shpesh nxehet qëllimisht, duke e vështirësuar dialogun midis Beogradit dhe Prishtinës. Misioni juaj për të mbajtur këtë dialog gjallë është kritik për të ardhmen e rajonit,” deklaroi Presidenti Mattarella.

Ai shtoi se stabiliteti dhe paqja në Ballkan mbeten faktorë kyç për procesin e integrimit europian dhe për sigurinë në Europë.