Tiranë – Prokuroria e Posaçme kundër Korrupsionit dhe Krimit të Organizuar (SPAK) i ka komunikuar zyrtarisht mbylljen e hetimeve ish-Presidentit të Republikës dhe kreut të Partisë së Lirisë, Ilir Meta.

Seanca u zhvillua këtë të hënë në ambientet e SPAK, ku i pranishëm ishte edhe avokati i Metës, Kujtim Cakrani. Ndërkohë, vetë Meta u transportua nga paraburgimi 313 drejt Prokurorisë për të marrë dijeni mbi zhvillimin e çështjes.

Ky komunikim ishte parashikuar që javën e kaluar, por u shty për shkak të mungesës së avokatit, i cili ndodhej jashtë Shqipërisë.

Më 27 maj, SPAK i kishte komunikuar Metës akuzat që rëndonin mbi të, ndërsa të njëjtën procedurë për mbylljen e hetimeve e kanë kaluar edhe bashkëshortja e tij Monika Kryemadhi, Pirro Xhixho, Ema Coku dhe Fatime Kryemadhi.

Pas seancës, avokati Cakrani deklaroi se “mali me akuza ndaj zotit Meta nuk qëndroi përballë fakteve”, duke theksuar se hetimi i gjatë rezultoi i pabazuar. “Klienti im është i pafajshëm për çdo pikë të dosjes,” tha ai.

Tashmë, Prokuroria e Posaçme pritet të vendosë për fatin përfundimtar të çështjes – nëse ajo do të dërgohet në gjykatë apo do të pushohet. Vendimi pritet me interes të lartë publik, për shkak të figurës politike që përfaqëson Ilir Meta.