Gjyqtarja italo-franceze Manuela Nicolosi ka rrëfyer për herë të parë vështirësitë dhe diskriminimin me të cilin është përballur gjatë karrierës së saj në futbollin profesionist, duke denoncuar seksizmin që, sipas saj, vazhdon të jetë i pranishëm në botën e arbitrimit.

Me mbi 200 ndeshje ndërkombëtare në karrierë — përfshirë finalen e Kupës së Botës për Femra 2019 dhe UEFA Superkupën 2019 mes Liverpool dhe Chelsea, ku ishte pjesë e ekipit të parë tërësisht femëror që arbitronte një finale meshkujsh — Nicolosi është bërë një nga emrat më të respektuar në fushën e saj.

Megjithatë, pas këtij suksesi, ajo tregon se rruga nuk ka qenë e lehtë:

“Në Francë nuk më promovuan nga Serie C në Serie B, sepse bija shumë në sy. Më thanë: ‘Duhet të jesh më pak e dukshme, tërheq shumë vëmendje.’”

Nicolosi thekson se justifikime të tilla janë të papranueshme:

“Gabimet teknike apo testet atletike janë normale. Por kur më ndalojnë me argumentin ‘bie në sy’, atëherë kemi një problem.”

Ajo pranon gjithashtu se është ngacmuar, por refuzon të japë detaje:

“Po, jam ngacmuar… por nuk dua të flas për këtë.”

Në fund, gjyqtarja bën një apel për barazi dhe guxim:

“Askush nuk duhet të zgjedhë midis personalitetit dhe karrierës. Çdo grua ka të drejtë të jetë vetvetja dhe të veshë çfarë të dojë, pa u penguar profesionalisht.”

Duke iu drejtuar vajzave të reja që ëndërrojnë një rol në sport, Nicolosi shton:

“Sigurohuni të jeni vetvetja. Duhet guxim, dhe mbështetja mes grave është thelbësore.”