Këngëtarja e njohur shqiptare, Elhaida Dani, ka ndarë për herë të parë emocionet dhe vështirësitë që përjetoi gjatë pjesëmarrjes në spektaklin “Dancing with the Stars”, ku u përfshi në një lidhje me kërcimtarin profesionist Ledian Agalliu.

E ftuar në emisionin “The Dalina Show”, Elhaida rrëfeu se pas lidhjes së tyre u përball me një valë të paprecedentë urrejtjeje në rrjete sociale, që e tronditi thellë emocionalisht.

“Më vinin mesazhe të tmerrshme! Mesazhe vrasjeje. Nuk ishte aspak e drejtë të ndodhte ajo gjë,” – tha artistja, duke shtuar se lidhja me Ledianin ndikoi edhe në ecurinë e saj në garë.
“Po të mos isha lidhur në ‘Dancing with the Stars’, do ta kisha fituar,” – u shpreh ajo me sinqeritet.

Këngëtarja, e njohur për talentin dhe karrierën e saj ndërkombëtare, tha se ajo periudhë e vështirë e bëri më të fortë dhe më të ndërgjegjshme për ndikimin që mund të kenë komentet negative në jetën e një personi publik.

“Ishte një periudhë që më tronditi shumë, por më ndihmoi të rritem shpirtërisht dhe të mësoj të mos lejoj urrejtjen të më ndalojë,” – tha Elhaida me emocione.