Kryeministrja italiane, Giorgia Meloni, ka shprehur shqetësimin e saj për zhvillimet e fundit në Lindjen e Mesme pas sulmit izraelito-amerikan ndaj Iranit, duke e lidhur situatën me një krizë më të gjerë të së drejtës ndërkombëtare.

Në një intervistë për Canale 5, Meloni theksoi se destabilizimi global filloi me luftën në Ukrainë, kur një anëtar i Këshillit të Sigurimit të OKB-së sulmoi një vend fqinj, duke hapur rrugën për një periudhë kaosi ndërkombëtar.

“Sigurisht që jam e shqetësuar, sepse do të ishte marrëzi të mendonim se ajo që po ndodh, edhe larg kufijve tanë, nuk na prek,” tha kryeministrja. Ajo nënvizoi se Italia ka bërë përpjekje të konsiderueshme për një marrëveshje mbi programin bërthamor iranian dhe se nuk mund të lejohet që Teherani të disponojë raketa me rreze të gjatë veprimi me koka bërthamore.

Meloni theksoi se dështimi i përpjekjeve diplomatike çoi në vendimin e SHBA-ve dhe Izraelit për të ndërmarrë sulme pa përfshirë partnerët evropianë. Ajo komentoi gjithashtu qëndrimin e ministrit italian të Mbrojtjes, Guido Crosetto, në Dubai, duke shtuar se Italia mbetet në kontakt të vazhdueshëm me vendet e Gjirit dhe partnerët evropianë, me qëllim shmangien e zgjerimit të krizës.

Sipas kryeministres, situata nuk mund të përmirësohet nëse Irani nuk ndalon sulmet ndaj vendeve të Gjirit, të cilat i konsideroi të pajustifikuara. Për rrezikun e sulmeve terroriste, Meloni deklaroi se niveli i gatishmërisë në Itali është maksimal, duke përfshirë të gjitha shërbimet kombëtare të sigurisë.