Kryeministrja italiane Giorgia Meloni ka zhvilluar një bisedë telefonike me presidentin ukrainas Volodimir Zelenski, në prag të vizitave që ky i fundit pritet të bëjë në Bruksel, Romë dhe Londër në ditët e ardhshme.

Gjatë komunikimit, Meloni rikonfirmoi solidaritetin e Italisë ndaj Ukrainës, sidomos pas sulmeve më të fundit ruse që kanë goditur infrastrukturën kritike të vendit.

Sipas njoftimit zyrtar të qeverisë italiane, Italia do të dërgojë material të jashtëzakonshëm për të mbështetur infrastrukturën energjetike ukrainase, si edhe për qytetarët e prekur nga situata. Ndihma do të përfshijë gjeneratorë energjie të prodhuar nga kompani italiane, të cilët pritet të mbërrijnë në Ukrainë në ditët e ardhshme.

Kryeministrja italiane ritheksoi gjithashtu mbështetjen e Italisë për negociatat që po zhvillohen aktualisht, duke vlerësuar edhe përpjekjet e Shteteve të Bashkuara për të ndërtuar një proces që mund të çojë drejt “një paqeje të drejtë dhe të qëndrueshme”.

Në njoftimin e Romës zyrtare nënvizohet se gatishmëria e Ukrainës për t’u ulur në tryezë me mirëbesim është një hap i rëndësishëm përpara, ndërsa u shpreh pritshmëria që një qasje e ngjashme të vijë edhe nga pala ruse, për të mundësuar avancimin e procesit të paqes.