Kryeministri Edi Rama ka dekoruar me medaljen e “Mirënjohjes Publike” ish-kryeministrin Fatos Nano.

Përmes një postimi në rrjetet sociale Rama shpreh mirënjohjen për Nanon, i cili prej një jave është i shtruar në një spital privat në Tiranë për shkak të problemeve me frymëmarrjen.

Rama vlerëson liderin historik të PS si figurë që diti të sjellë një frymë liberale në një periudhë mjaft të errët në vendin tonë, ku sipas tij mbizotëronte shpirti i hakëmarrjes, padijes dhe errësirës. Nano arriti t’i kapërcente këto barriera edhe pse vuajti me të padrejtë në fillim.

Gjithashtu Rama i ka akorduar Nanos “Kordonin e Madh me Yll të Mirënjohjes Publike” sepse bëri gjithçka që mundi në rolet e rënda që pati për të shëruar plagët e tranzicionit.

Postimi:
LUTEM PËR FATOS NANON🙏
Në këto orë të vështira të luftës për jetën, lideri historik i Partisë Socialiste dhe njeriu që vuajtjen e padrejtë të heqjes së lirisë e ktheu në burimin e një fryme liberale në udhëheqje, në një kohë kur Shqipëria përballej me shëmtinë e egër të një konflikti politik të nxitur nga shpirti i hakmarrjes, padijes, errësirës dhe me egërsinë e pakufishme të një kapërcimi të madh historik, nga izolimi i tejskajshëm komunist drejt demokracisë si sprovë e tejmundimshme, në një tokë të djegur prej zjarrit e hekurit të perandorive e regjimeve që pasuan njëri-tjetrin qysh prej pavarësimit të Shqipërisë, ku nuk u rrit dot kurrë shtati institucional i shtetit e ku liria e ardhur me furinë e zemëratës popullore solli bashkë me dritën e së ardhmes edhe plagët e tmerrshme të shkatërrimit të shumëçkaje në emër të luftës për demokraci, meriton sot lutjet tona dhe mirënjohjen tonë për gjithçka të mirë mundi t‘i japë vendit dhe shoqërisë në rolet e rënda që pati gjatë karrierës së tij me të përpjeta e të tatëpjeta të mundimshme🙏❤️🏵️