Ish-kreu i policisë së shtetit, Gledis Nano, ka shprehur ngushëllimet e tij për humbjen e efektivit të forcave “Shqiponja”, Novruz Cenalia, i cili humbi jetën në Fier, pranë banesës së tij, teksa po shkonte për të marrë shërbimin. Në një postim në Facebook, Nano theksoi rreziqet me të cilat përballen çdo ditë punonjësit e policisë në vend dhe rëndësinë e ndërgjegjësimit për sfidat e tyre.
Ngjarja tragjike ndodhi në fshatin Baltëz të Fierit dhe autori i dyshuar i vrasjes, Azgan Mërcina, ende nuk është kapur nga policia. Dyshohet se vrasja ndodhi si pasojë e një konflikti të çastit.
Gledis Nano në mesazhin e tij shkruan:
> “Tragjedia e fundit në fshatin Baltëz të Fierit shërben si kujtesë e fortë e rreziqeve me të cilat përballen çdo ditë efektivët e rendit. Një punonjës policie i forcave “Shqiponja” humbi jetën, duke lënë pas një familje të pikëlluar, kolegë dhe një komunitet në zi.
> Çdo anëtar i këtij komuniteti meriton të ndihet i sigurt dhe çdo oficer meriton të kthehet në shtëpi.
> Ngjarje si kjo japin shembull për të rritur ndërgjegjësimin për sfidat me të cilat përballet forca policore dhe rëndësinë e sigurimit të burimeve dhe mbështetjes që u nevojiten për të mbrojtur dhe për t’i shërbyer komunitetit tonë në mënyrë efektive.
> Në solidaritet për sakrificat e të gjithë Shqiponjave.
> RIP Novruz Cenalia.”
Ky mesazh vjen si një thirrje për të rritur mbështetjen dhe sigurinë për punonjësit e policisë, të cilët shpeshherë përballen me rreziqe të larta në krye të detyrës së tyre.
