Tiranë, 5 gusht 2025 – Avokatët e Ilir Metës, president i Partisë së Lirisë dhe ish-president i Republikës, kanë depozituar një kërkesë për zëvendësimin e masës së paraburgimit në Gjykatën e Shkallës së Parë Kundër Korrupsionit dhe Krimit të Organizuar (GJKKO).

Në kërkesën zyrtare, përfaqësuesit ligjorë të Metës argumentojnë se nuk ekziston më asnjë justifikim procedural për mbajtjen e tij në burg, pasi Prokuroria e Posaçme (SPAK) ka përfunduar hetimet dhe i ka komunikuar tashmë akuzat.

“Nevojat për ta mbajtur Metën akoma nën paraburgim nuk kanë më asnjë kuptim procedural,” – thuhet në deklaratën e avokatëve.

Meta ndodhet në paraburgim që prej tetorit 2024, për çështjet që lidhen me dosjen CEZ/DIA dhe lobimin në SHBA.

Ai akuzohet nga SPAK për:
• Pastrim të produkteve të veprës penale ose veprimtarisë kriminale
• Korrupsion pasiv i funksionarëve të lartë shtetërorë ose të zgjedhurve vendorë
• Refuzim për deklarim, mosdeklarim, fshehje dhe deklarim i rremë i pasurive dhe interesave private

Meta ka mohuar vazhdimisht akuzat, duke i cilësuar ato si të motivuara politikisht.

Në një deklaratë të shpërndarë nga Partia e Lirisë, theksohet se kërkesa për zëvendësimin e masës synon rikthimin e të drejtave themelore të Metës, në një kohë kur faza hetimore ka përfunduar dhe procesi po kalon drejt gjykimit.

Ende nuk është caktuar data kur GJKKO do të shqyrtojë këtë kërkesë.