Presidenti i vendit Ilir Meta ka zhvilluar një takim ditën e sotme me kreun e Republikanëve të rinj në SHBA. Përmes një postimi në rrjetin e tij social Facebook ku ndan fotot nga takimi, ai shkruan se ishte nder t’i dorëzohej nga zoti Rick Loughery flamuri amerikan shoqërues valëvitës mbi Kapitol.

Kreu i shtetit thekson se u njoh me nismën e re rë kësaj force politike dhe se do rritet bashkëpunimi mes dy vendeve me projektet e ardhshme.

Postimi i plotë:
Kënaqësi e posaçme të takoja Kryetarin Nacional të Republikanëve të Rinj të Shteteve të Bashkuara, z.Rick Loughery dhe bashkëpunëtorët e tij.
I nderuar të më dorëzonte, me propozim të Kongresmenit, z.Ron Estes, flamurin amerikan shoqërues valëvitës mbi Kapitol.

Më njohën me nismën për forcimin e bashkëpunimit të “Republikanëve” të rinj me FRPD, një kontribut i çmuar për marrëdhëniet e gjithanshme midis dy vendeve tona dhe i lumtur të dëgjoja nga z.Loughery se do të rikthehen së shpejti në Tiranë për projekte të reja bashkëpunimi.

Një brez i ri politikanësh dinamikë dhe bartës të vlerave më të mira të demokracisë amerikane, janë një garanci më shumë dhe afatgjatë për forcimin e mëtejshëm të marrëdhënieve të shkëlqyera midis Shqipërisë dhe Shteteve të Bashkuara.

Përfshirja më e gjerë dhe aktive e të rinjve në politikë, domosdoshmëri për ndryshime të shpejta dhe premtuese.