Në një ceremoni të ndjerë që u zhvillua sot në Sheshin e Shën Pjetrit, mijëra besimtarë i dhanë lamtumirën e fundit Papa Françeskut, i cili ndërroi jetë më 21 prill në moshën 88-vjeçare në Romë.

Riti i varrimit nisi me tingujt e këmbanave, teksa arkivoli me trupin e Atit të Shenjtë u vendos në shesh, përballë një deti njerëzish që e pritën me duartrokitje dhe përulësi. Kapaciteti maksimal prej 50.000 personash në Sheshin e Shën Pjetrit ishte mbushur plot, ndërsa më shumë se 100.000 të tjerë ndiqnin ceremoninë nga bulevardi Via della Conciliazione.

Funeralin e udhëhoqi Dekani i Kolegjit të Kardinalëve, Kardinali Giovanni Battista Re. Në anën e djathtë të oborrit, pranë statujës së Shën Pjetrit, ishin vendosur kardinalët, peshkopët dhe priftërinjtë, që i bashkoheshin lutjes për Atin e Shenjtë.

Në Vatikan kanë mbërritur rreth 160 delegacione nga e gjithë bota, përfshirë krerë shtetesh dhe qeverish, për të nderuar jetën dhe veprën e Papa Françeskut, i cili mbetet një figurë e dashur dhe e respektuar nga miliona besimtarë në mbarë botën.