Milani do të ndeshet me Leccen pa sulmuesin kryesor Rafael Leao, i cili ende nuk është rikuperuar nga dëmtimi në pulpën e djathtë. Pas humbjes në ndeshjen hapëse ndaj Cremoneses, trajneri Massimiliano Allegri ka vendosur të mos rrezikojë portugezin dhe ta ruajë për stërvitjet në Milanello dhe ndeshjen kundër Bolonjës më 14 shtator në San Siro.

Mungesa e Leao-s ka ndikuar dukshëm në sulmin kuqezinj, i cili në ndeshjen hapëse dukej i steril dhe pa ritëm, duke nxjerrë në pah varësinë e Milanit nga portugezi për krijimin e mundësive dhe finalizimin. Allegri duhet të gjejë zgjidhje për të shmangur një tjetër humbje dhe një start tronditës të sezonit.

Për ndeshjen ndaj Lecces, trajneri pritet të besojë te dyshja sulmuese Gimenez-Pulisic, ndërsa De Winter do të marrë vendin e Gabbias në mbrojtje. Në mesfushë, Luka Modric do të ketë rol qendror, duke synuar të sjellë ndriçim dhe kreativitet në një ekip që për momentin duket në errësirë.

Tifozët kuqezinj shpresojnë që skuadra të gjejë ritmin e munguar dhe të shmangë dy humbjet radhazi që do të ishin një start alarmues për sezonin.