Një grabitje që mund të kishte kaluar si një vjedhje e zakonshme, rezultoi një nga më të bujshmet e kohëve të fundit në Itali. Tre të rinj, me precedentë penalë dhe të parregullt në Itali, vodhën nga një tren “Frecciarossa” një çantë shpine – pa e ditur se brenda saj ndodhej një pasuri me vlerë qindra mijëra euro.

Ngjarja ndodhi të enjten pasdite, në trenin që udhëtonte nga Firence për në Milano. Hajdutët kishin vjedhur një çantë nga një dollap sipër një sediljeje, pa e ditur se kishin futur duart në një “thesar”. Brenda saj gjendeshin një orë luksoze Richard Mille me vlerë 1 milion euro, një Patek Philippe prej 200,000 euro, një Breitling, një xhaketë me gurë Cartier, si dhe bizhuteri, syze dhe varëse që së bashku kapnin vlerën e 300,000 eurove të tjera.

Totali? Mbi 1.5 milion euro në objekte luksi, të gjitha në pronësi të aktores italo-amerikane Tatiana Luter, e njohur për pjesëmarrjen në filmin “Maserati: The Brothers” dhe projekte të tjera ndërkombëtare. 35-vjeçarja, që numëron mbi 100 mijë ndjekës në Instagram, po udhëtonte për në Milano, ku ndodhet nëna e saj, shoqëruar nga një mik italo-francez dhe një i mitur.

Policia hekurudhore e Milano Centrale dyshoi për sjelljen e tre të rinjve – të moshave 20, 21 dhe 24 vjeç – dhe ndërhyri në kohë. Çanta u gjet në një karrocë që ata po përpiqeshin të largonin nga stacioni. Hajdutët, me origjinë algjeriane, ishin të njohur për autoritetet, të kapur edhe më parë në vepra të ngjashme në zona të ndryshme të Italisë.

Luter, e cila ka marrë pjesë edhe në filmin “Youth” të Paolo Sorrentinos dhe ka ndarë një selfie me legjendën e kinemasë Al Pacino, shpëtoi pa pasoja fizike, por me një tronditje të madhe nga vjedhja.

Falë reagimit të shpejtë të autoriteteve, ajo rikuperoi pasuritë e saj – ndërsa grabitësit tashmë përballen me drejtësinë për vjedhje të rëndë me paramendim.