Presidenti i Republikës Srpska, Milorad Dodik, i cili prej kohësh është nën sanksione nga SHBA dhe Britania e Madhe, ka pranuar të tërhiqet nga posti i tij, duke shënuar një kthesë të rëndësishme në krizën politike të Bosnjës dhe Hercegovinës.

Departamenti Amerikan i Thesarit njoftoi të premten se ka hequr sanksionet ndaj katër bashkëpunëtorëve të ngushtë të Dodikut, si hap i parë drejt normalizimit të marrëdhënieve. Ky vendim u përshëndet nga vetë Dodik, i cili po lobon për heqjen e masave ndëshkuese edhe ndaj tij personalisht.

Në një deklaratë për Reuters, zyrtari i lartë i Departamentit të Shtetit për Çështjet Evropiane dhe Euroaziatike, Brendan Hanrahan, theksoi rëndësinë e këtij zhvillimi:

“Shtetet e Bashkuara e mirëpresin veprimin e sotëm të Asamblesë Kombëtare të Republikës Serbe që afirmon stabilitetin në Bosnjë dhe Hercegovinë.
Ky veprim do të shënojë gjithashtu një rrugë për partneritet konstruktiv me SHBA-në, bazuar në interesa të përbashkëta, potencial ekonomik dhe begati të përbashkët.”

Tërheqja e Dodikut shihet si një hap drejt zbutjes së tensioneve dhe mundësi për heqjen graduale të sanksioneve ndaj tij.

Asambleja e Republikës Srpska ka emëruar Ana Trišić Babić si presidente të përkohshme, e cila do të ushtrojë detyrën për një muaj, deri në zgjedhjet presidenciale të 23 nëntorit.

Në të njëjtën seancë, parlamenti shfuqizoi disa ligje separatiste, të miratuara gjatë vitit të kaluar — vendime që ishin në qendër të akuzave ndaj Dodikut për shkelje të Marrëveshjes së Paqes së Dejtonit dhe për rrezikim të stabilitetit rajonal.

Dodik, i sanksionuar nga SHBA, Britania dhe disa shtete të BE-së, akuzohej për përpjekje për shpërbërjen e Bosnjës përmes politikave të tij separatiste.
Vendimi i tij për t’u tërhequr shihet si një sinjal i qartë i presionit ndërkombëtar, por edhe si përpjekje për të shmangur izolimin e mëtejshëm politik dhe ekonomik të entitetit serb brenda Bosnjës.