Deputetja e Partisë Socialiste, Milva Ekonomi, ka reaguar ashpër ndaj sulmit të protestuesve të Partisë Demokratike ndaj vilës së ish-diktatorit Enver Hoxha gjatë tubimit të 28 shkurtit. Ajo theksoi se përpjekjet e opozitës për të zhvendosur vendin drejt një krize politike nuk ndikojnë vetëm një palë, por dëmtojnë imazhin dhe interesin kombëtar të Shqipërisë.

“Për Shqipërinë, stabiliteti ndërkombëtar është interes i drejtpërdrejtë. Angazhimi në struktura që promovojnë paqen është një akt përgjegjësie. Protesta nuk mund të zëvendësojë debatin institucional, dhe dhuna, zjarri apo shkatërrimi nuk janë alternativë. Demokracia nuk është vetëm e drejta për të protestuar, por dhe për të kontribuar me ide,” tha Ekonomi.

Ajo shtoi se aktet e dhunës që goditën Vilën 31, rezidencë për artistë kombëtarë që nga viti 2025, janë të papranueshme dhe organizatorët nuk duhet të injorojnë këtë fakt. “Shqiptarët presin stabilitet, jo konflikte pa fund. Shqipëria nuk ka luksin e krizave të fabrikuara politike,” përfundoi deputetja e PS-së.