Ministri i Jashtëm i Maqedonisë së Veriut, Timco Mucunski, dhe Ministri i Shëndetësisë, Arben Taravari, së bashku me zv.ministrin e Jashtëm të Greqisë, Tassos Hatzivasiliou, dhe zv.ministrin e Brendshëm, Konstantinos Giulekas, vizituan të plagosurit nga tragjedia e Koçanit, të cilët po trajtohen në spitalin Papanikolaou të Selanikut.

Ata u takuan me tre të rinj, dy vajza dhe një djalë, të cilët ndodhen në gjendje kritike për shkak të djegieve të rënda dhe dëmtimeve të mushkërive dhe rrugëve të frymëmarrjes.

Sofia Papadopoulou, drejtuesja e njësisë së djegieve në spital, tha se gjendja e pacientëve mbetet kritike dhe e pasigurt, për shkak të dëmtimeve nga tymi. Dy prej tyre do t’i nënshtrohen sërish operacioneve, ndërsa njëri do të operohet në ditët në vijim.

Ministrat vizituan gjithashtu spitalin ushtarak 424 në Selanik, ku po trajtohen dy pacientë të tjerë. Ministri Mucunski falënderoi Greqinë për solidaritetin e treguar, duke theksuar se ky moment tragjik do të mbetet në kujtesën kolektive, por gjithashtu edhe për ndihmën e jashtëzakonshme që autoritetet greke kanë dhënë.

Nga ana tjetër, zv.ministri i Jashtëm grek, Tassos Hatzivasiliou, vlerësoi bashkëpunimin e ngushtë mes Greqisë dhe Maqedonisë së Veriut, duke theksuar se pacientët u transferuan menjëherë në spitalet e Selanikut dhe Athinës për të marrë kujdesin e nevojshëm.