Pas akuzave të ngritura nga atletja kampione Europiane, Luiza Gegë, se i janë mohuar shpërblime nga Ministria e Arsimit dhe Sportit për shkak të mungesës së kontrolleve antidopingu në disa gara, Ministria reagon duke mohuar pretendimet dhe duke theksuar se mbështetja për Gegën ka qenë e plotë. Luiza Gegë ka theksuar se shpërblimet nuk janë dhënë për shkak të absencës së kontrolleve dopingu, ndërsa Ministria konfirmon se ka ofruar dhe do të ofrojë mbështetje të vazhdueshme për Gegën dhe sportistët tjerë elitë.

Nga ana tjetër, Ministria pohon se atletia ka marrë 13 shpërblime në 10 gara ndërkombëtare në dy vitet e fundit, duke pohuar se ata janë të informuar dhe angazhuar në promovimin e suksesit të sportistëve shqiptarë në skenën ndërkombëtare.

Reagimi:

“Mbështetja e sportistëve elitarë është në qendër të politikave të Ministrisë së Arsimit dhe Sporteve.

MAS i ka mbështetur dhe mbështet në vazhdimësi sportistët elitarë dhe trajnerët e tyre përmes mbështetjes për federatat dhe përmes shpërblimeve direkte për rezultatet që kanë arritur në gara në arenën ndërkombëtare.

Shpërblimet e dhëna bazohen në parashikimet e nenit 27 të Ligjit 79/2017 “Për sportin” i ndryshuar dhe akteve nënligjore që rrjedhin prej tij.

Vetëm për vitin 2023 shpërblimet e sportistëve elitarë kanë rezultuar rreth 55 milionë lekë për 23 sportistë elitarë dhe trajnerët respektive për arritjet në sportet që përfaqësojnë.

Atletja jonë Luiza Gega, është mbëshetur gjatë dy viteve të fundit me 13 shpërblime për 10 gara ndërkombëtare, bazuar në arritjet e saj, që nga niveli Botëror deri te ai Ballkanik, pesë prej të cilave janë shpërblime për arritjet e vitit 2023.

Do të vijojmë edhe gjatë këtij viti, duke qënë dhe një vit olimpik, mbështetjen për sportistët tanë elitarë,”-thuhet në reagimin e Ministrisë së Arsimit dhe Sportit.