Aachen, Gjermani – Ministrja e Shtetit për Administratën Publike dhe Antikorrupsionin, Adea Pirdeni, mori pjesë në panelin me temë “Më shumë Evropë për një Evropë më të fortë?” gjatë Forumit Evropian Karlspreis 2025, që u zhvillua në Aachen.

Në fjalën e saj, Pirdeni paraqiti përvojën e Shqipërisë si një shembull transformimi, duke theksuar kalimin nga institucione të brishta drejt një shteti që ka përqafuar reformat si rrugën kryesore për zhvillimin dhe të ardhmen.

Ministrja theksoi se procesi i integrimit në Bashkimin Evropian nuk është thjesht një çështje teknike apo ekonomike, por një katalizator kyç për ndërtimin e institucioneve të forta dhe të besueshme, forcimin e sundimit të ligjit dhe modernizimin e qeverisjes.

“Jam mirënjohëse për mikpritjen e shkëlqyer të Karlspreis dhe për mundësinë për të diskutuar si evropianë mes evropianësh për të ardhmen tonë të përbashkët,” u shpreh Pirdeni.

Ky forum ka qenë një platformë e rëndësishme për dialogun mbi sfidat dhe perspektivat e integrimit evropian, ku Shqipëria po afirmohet si një aktor i rëndësishëm në rajonin e Ballkanit Perëndimor.