Gazetarja e njohur Mira Kazhani ka ndarë me ndjekësit një rrëfim të ndjeshëm për betejën e saj me kancerin e gjirit, që ka nisur një vit më parë. Përmes podcastit të saj, ajo tregoi se diagnoza e papritur më 2 nëntor 2024 ishte si një “dimër i jetës” së saj, që ndryshoi gjithçka përtej ekranit.

“U diagnostikova me kancer në gji dhe që prej asaj dite gjithçka ndryshoi përgjithmonë. Në atë kohë zgjodha të hesht, të përqëndrohem te shërimi im dhe të mos bëhem lajm në rrjet. Sot ndihem mirënjohëse ndaj kolegëve që e ruajtën sekretin dhe më dhanë qetësi”, shprehet Kazhani.

Ajo rrëfeu se fuqinë e ka gjetur duke dëgjuar histori të grave të tjera që kanë kaluar të njëjtën sfidë, duke theksuar se edhe diagnostikimi i hershëm nuk e bën sëmundjen më pak të rëndë: “Nuk ka kancer të lehtë, është makth. Edhe kur zbulohet në fazat e para, është një plagë e madhe në shpirt e trup”.

Në librin e saj “Një ditë tjetër”, Kazhani ka dokumentuar këtë periudhë të vështirë, duke ndarë dhimbjen, frikën, por edhe shpresën dhe guximin që e kanë shoqëruar gjatë gjithë rrugëtimit. Gazetarja e përshkruan këtë podcast si rrëfimin më të vështirë të jetës së saj dhe u shpreh se për këtë episod ka ulur përballë një shoqe të ngushtë, për të ndarë ndjesitë më të thella.