TIRANË – Pas më shumë se tre orësh debat në seancën plenare të ditës së sotme, Kuvendi miratoi projektligjin “Për performancën energjetike të ndërtesave” me 72 vota pro dhe vetëm një kundër.

Opozita nuk ishte e pranishme në momentin e mbylljes së seancës, ndërsa deputeti i vetëm demokrat në sallë, Dashnor Sula, votoi kundër projektligjit.

Mësohet se mazhoranca arriti të sigurojë kuorumin dhe shumicën falë pranisë së deputetëve të Partisë Socialdemokrate (PSD), të cilët i dhanë mbështetje projektligjit, duke “shpëtuar” kështu miratimin në këtë seancë.

Kjo nismë ligjore pritet të ketë ndikim të rëndësishëm në fushën e eficiencës energjetike në ndërtesa, ndërsa opozita vijon të kundërshtojë procesin dhe mungesën e debatit të gjerë.