Profesionistë të shëndetit dhe pacientë mund të vazhdojnë të përdorin barna anti-inflamatore jo-steroide (AIJS), përfshi këtu ibuprofenin, në përputhje me udhëzuesit e miratuar, duke qenë se aktualisht nuk ka prova shkencore se ekziston një lidhje mes AIJS-ëve dhe përkeqësimit të COVID-19.
Organizata Botërore e Shëndetit (OBSH), Agjencia Evropiane e Barnave (EMA) dhe Agjencia Amerikane e Ushqimeve dhe Barnave (FDA) ka dalë në përfundimin se nuk ekziston asnjë lidhje mes AIJS-ëve dhe përkeqësimit të COVID-19.
Me shpërthimin e pandemisë COVID-19, pati një shqetësim në rritje në publik në lidhje me përdorimin e barnave anti-inflamatore jo-steroide, veçanërisht në rrjete sociale. Ndërkohë, ka pasur një konfuzion në rritje mes pacientëve që përdorin barna anti-inflamatore jo-steroide (përfshi ibuprofenin) për sëmundje kronike dhe sëmundje të tjera.
Këto përfundime u diskutuan gjatë një seminari virtual të profesionistëve të shëndetit të organizuar kohët e fundit në Tiranë.
Më 28 prill, rreth 400 mjekë dhe farmacistë nga Shqipëria diskutuan gjatë një seminari virtual organizuar në Tiranë në lidhje me sigurinë e AIJS-eve gjatë pandemisë së COVID-19. Me këtë rast u bë edhe një paraqitje e pikëpamjeve të bëra publike nga organizatat shëndetësore dhe rezultatet e kërkimeve të bëra.
Folësit ishin në të njëjtën linjë me qëndrimin e autoriteteve shëndetësore globale se aktualisht nuk ekziston asnjë lidhje mes barnave anti-inflamatore jo-steroide (siç është ibuprofeni) dhe përkeqësimit të gjëndjes së shkaktuar nga COVID-19; barnat anti-inflamatore jo-steroide mund të vazhdojnë të përdoren në përputhje me informacionet e miratuara të produktit.
“Nuk ekziston asnjë element që vërteton efektet negative serioze dhe ndikimin afatgjatë në mbijetesën dhe në cilësinë e jetës së pacientëve të prekur nga COVID-19 si rezultat i përdorimit të barnave anti-inflamatore jo-steroide,” u tha në njoftimin e publikuar nga Organizata Botërore e Shëndetit (OBSH)1 i cili iu paraqit Profesionistëve Shqiptarë të Shëndetit gjatë seminarit virtual.
Doktor Arian Mezini, pneumolog në spitalin universitar “Shefqet Ndroqi” në fjalën e tij foli për përdorimin e barnave anti-inflamatore jo-steroide dhe COVID-19. Dr. Arian Mezini paraqiti deklarata nga OBSH, EMA dhe FDA, të cilat janë të gjitha në një linjë për sa i përket faktit se pacientët dhe profesionistët e shëndetësisë mund të vazhdojnë të përdorin barna anti-inflamatore jo-steroide (siç është ibuprofeni) në përputhje me informacionet e miratuara të produktit.
“Aktualisht nuk ka asnjë arsye që pacientët të cilët përdorin ibuprofen ta ndalin trajtimin. Kjo është veçanërisht e rëndësishme për pacientë që marrin ibuprofen apo barna të tjera anti-inflamatore jo-steroide për sëmundje kronike,” shpjegoi dr. Arian Mezini, i cili iu referua deklaratës së Agjencisë Evropiane të Barnave (EMA).2
Gjatë fazave të para të pandemisë së koronavirusit (COVID-19) ekzistonte shqetësimi se ibuprofeni, një bar që përdoret rëndom për trajtimin e dhimbjes dhe temperaturës, por edhe të sëmundjeve kronike, mund ta përkeqësonte gjendjen shëndetësore të një pacienti të prekur nga koronavirusi. Për shkak të këtyre pretendimeve, u krye një studim danez i bazuar në regjistrin civil kombëtar, për të hetuar lidhjen mes barit anti-inflamator jo-steroid dhe vdekshmërisë për 30 ditë dhe pasojave të tjera negative të sëmundjes, siç është hospitalizimi dhe shtrimi në terapi intensive, intubimi dhe terapia akute e zëvendësimit renal në të gjithë pacientët që kishin rezultuar pozitiv për SARS-CoV-2. Studimi danez nuk ka treguar asnjë lidhje mes rezultatit të shpallur dhe përdorimit të barnave anti-inflamatore jo-steroide, përfshi ibuprofenin.
“Ne jemi në dijeni të shumë lajmeve të rreme që janë përhapur në internet, veçanërisht në fazën e parë të pandemisë COVID-19 dhe shpresoj që të jemi të gjithë të vetëdijshëm për faktin se duhet të tregohemi mjaft të kujdesshëm në trajtimin e lajmeve të tilla. Kur bëhet fjalë për barna anti-inflamatore jo-steroide, siç është ibuprofeni, më duhet të nxjerr në pah faktin se Agjencia e Ushqimeve dhe Barnave (FDA) ka vënë në dukje se aktualisht nuk ekziston asnjë lidhje mes përdorimit të barnave dhe përkeqësimit të simptomave të infeksionit COVID-19,3 –dr. Arian Mezini.
Në fund, u arrit në përfundimin se kur fillon trajtimi i temperaturës apo dhimbjes te pacientët me COVID-19, pacientë dhe profesionistë të shëndetit duhet t’i shqyrtojnë të gjitha opsionet e mundshme, përfshi këtu paracetamolin dhe barnat anti-inflamatore jo-steroide. Çdo bar ka të mirat dhe rreziqet e tij të cilat listohen në informacionin e produktit (Përmbledhje e Karakteristikave të Produktit dhe Fletushka me Informacione për Pacientin).
Ky seminar virtual u mbështet nga kompania BGP Products Switzerland, zyra e përfaqesisë Tiranë, një kompani Viatris.
