Prokuroria pranë Gjykatës së Shkallës së Parë të Juridiksionit të Përgjithshëm Fier ka regjistruar procedimin penal nr. 929, për veprat penale “Shpërdorimi i detyrës” dhe “Korrupsioni pasiv i personave që ushtrojnë funksione publike”, të parashikuara nga nenet 248 dhe 259 të Kodit Penal.

Në qendër të hetimeve është mjeku imazherist G.T, i cili ushtronte detyrën pranë Spitalit Rajonal Fier. Sipas informacionit paraprak, ai dyshohet se gjatë orarit të punës largohej nga spitali publik dhe ofronte shërbime mjekësore në dy klinika private afër spitalit: spitali privat “A” dhe klinika “I M”.

Hetimet e prokurorisë përfshinë vëzhgime në vende publike dhe veprime simuluese, të cilat konfirmuan veprimtarinë korruptive të mjekut. Dy episodet kryesore të dokumentuara ishin datat 29 dhe 31 tetor 2025, ku u evidentua marrja e përfitimeve monetare në mënyrë të parregullt.

Pas disa muaj hetime dhe përdorimi i metodave speciale, G.T u kap në flagrancë. Gjatë kontrollit personal dhe të banesës së tij u sekuestruan:
• 27,800 lekë të dhëna gjatë veprimeve simuluese;
• 39,155 euro;
• 1,857,000 lekë;
• 2,370 paund;
• 75 dollarë;
• 10 franga.

Prokuroria kërkoi arrest në burg, por Gjykata e Shkallës së Parë të Juridiksionit të Përgjithshëm Fier vendosi “Arrest në shtëpi” për shtetasin G.T, sipas nenit 237 të Kodit të Procedurës Penale.

Hetimet pritet të vazhdojnë për të dokumentuar plotësisht veprimtarinë e dyshuar korruptive dhe të mbledhin prova shtesë mbi përfitimet e paligjshme.