Modelja e njohur Miranda Kerr ka deklaruar se nuk planifikon të ketë më fëmijë, duke theksuar se ndihet plotësisht e përmbushur me familjen që ka krijuar. Në një intervistë për numrin e dhjetorit të Vogue Australia, modelja 41-vjeçare ndau emocionet dhe vendimin e saj mbi këtë çështje.

“Ndihem e kompletuar. E di që Evan (bashkëshorti im) do të donte të kishte dhjetë fëmijë nëse do të varej nga ai, por unë nuk jam tipi që mund të lejoj të tjerët të rrisin fëmijët e mi,” u shpreh Kerr.

Miranda dhe bashkëshorti i saj, miliarderi Evan Spiegel, janë prindër të tre djemve: Hart (6 vjeç), Miles (5 vjeç) dhe Pierre (9 muajsh). Përveç kësaj, Miranda është nëna e Flynn-it, 13 vjeç, të cilin e ka nga martesa e saj e mëparshme me aktorin Orlando Bloom.

Pavarësisht dëshirës së Evan-it për një familje më të madhe, Miranda tha se përkushtimi dhe përmbushja që gjen në rritjen e katër djemve të saj janë të mjaftueshme për të. “Për mua, familja që kemi është gjithçka që mund të kërkoja,” shtoi ajo.