Pas një paraqitjeje në Apelin e Posaçëm, Monika Kryemadhi ka deklaruar se nuk do të angazhohet më në politikë aktive, duke lënë të hapur të ardhmen e saj përtej arenës parlamentare. Edhe pse vazhdon të jetë deputete në Kuvend, Kryemadhi tha se nuk ka dëshirë të kandidojë në zgjedhjet e ardhshme parlamentare.

Ajo theksoi se misioni i saj në të ardhmen do të jetë sensibilizimi i opinionit publik për rreziqet që sjellin kandidimet e individëve të papërshtatshëm dhe ndikimi negativ i lajmeve të rreme (fake news), të cilat i krahasoi me një Luftë të Tretë Botërore.

“Unë nuk merrem më me politikë,” deklaroi Kryemadhi. “Do të merrem me sensibilizimin e opinionit publik përsa i përket manipulimit dhe Luftës së Tretë Botërore që është fake news-i. Nuk kam dëshirë për të kandiduar, por nuk do të lejoj njerëzit jo të duhur që të kandidojnë.”

Kjo deklaratë lë të kuptohet një zhvendosje të fokusit të saj nga politika tradicionale drejt çështjeve të ndërgjegjësimit publik dhe luftës kundër dezinformimit, duke theksuar një rol më aktiv në edukimin qytetar për zgjedhjet politike dhe përmbajtjen mediatike.