Ministria e Jashtme e Rusisë ka publikuar një listë të re me deklarata të udhëheqësve perëndimorë, të cilat i cilëson si shembuj të “gjuhës së urrejtjes” ndaj Rusisë. Mes tyre është përfshirë edhe një deklaratë e presidentit italian Sergio Mattarella, mbajtur më 5 shkurt gjatë një fjalimi në Universitetin e Marsejës, ku ai bëri paralele mes luftërave pushtuese të Rajhut të Tretë dhe agresionit rus në Ukrainë.

Lista, që sipas “La Repubblica” u përgatit paraprakisht nga Moska dhe më pas u publikua në faqen zyrtare të ministrisë, titullohet “Shembuj deklaratash nga zyrtarë dhe përfaqësues të elitës perëndimore rreth Rusisë që përdorin gjuhë urrejtjeje”. Ajo përfshin përfaqësues nga 13 vende, BE dhe NATO.

Për Italinë është cituar vetëm deklarata e Mattarellas, ndërsa në dokument renditen gjithashtu kancelari gjerman Friedrich Merz, presidenti francez Emmanuel Macron, tre deklarata të sekretarit të përgjithshëm të NATO-s Mark Rutte dhe shtatë të shefes së diplomacisë europiane Kaja Kallas.

Nga SHBA është përfshirë vetëm një deklaratë e senatorit republikan Lindsay Graham, i cili së fundmi u shpreh se, sikurse Shtetet e Bashkuara kanë bombarduar Iranin në të kaluarën, “mund ta kishin bërë të njëjtën gjë me Rusinë” nëse Moska nuk i përgjigjej ultimatumit të presidentit Trump për paqe në Ukrainë.

Ky nuk është rasti i parë që Italia përfshihet në një listë të tillë. Në vitin 2024, ministri i Jashtëm Antonio Tajani dhe ai i Mbrojtjes Guido Crosetto u përfshinë për deklarata të cilësuara nga Moska si “gjuhë urrejtjeje”.

Pas publikimit të listës së re, Ministria e Punëve të Jashtme të Italisë ka thirrur ambasadorin rus në Romë për shpjegime.