Reshjet intensive dhe erërat e forta kanë sjellë probleme në disa zona të jugut të vendit, duke krijuar situata të rrezikshme për qarkullimin rrugor.

Në zonën e Pylli i Sodës, gjatë orëve të para të mëngjesit, disa pemë janë rrëzuar si pasojë e motit të keq. Rreth orës 04:00, një automjet është përplasur me një nga pemët e rrëzuara në rrugë, duke shkaktuar bllokim të përkohshëm të qarkullimit për disa minuta. Fatmirësisht, nuk raportohet për persona të lënduar. Shërbimet përkatëse ndërhynë për largimin e pengesës dhe situata u normalizua.

Ndërkohë, probleme janë raportuar edhe në Himarë, ku për shkak të reshjeve të dendura të shiut, rruga kryesore e fshatit Sënvasil është bllokuar nga rrëshqitjet e dherave.

Banorët i bëjnë thirrje autoriteteve për ndërhyrje të shpejtë me mjete të rënda për pastrimin e segmentit rrugor, pasi lëvizja është vështirësuar ndjeshëm dhe rreziku mbetet i pranishëm nëse kushtet atmosferike përkeqësohen.