Tiranë – Aktori, regjisori dhe dramaturgu i njohur shqiptar Naun Shundi po kalon një periudhë të vështirë për shkak të një sëmundjeje që e ka detyruar të tërhiqet nga aktiviteti artistik. Shundi, themelues i teatrit “Zonja e Bujtinës”, ndodhet aktualisht në Francë për t’iu nënshtruar një trajtimi të specializuar, ndërsa kostot e larta të kurës kanë shkaktuar vështirësi financiare për familjen e tij.

Në përgjigje të kësaj situate, Ministria e Shëndetësisë dhe Mbrojtjes Sociale dhe Ministria e Ekonomisë, Kulturës dhe Inovacionit kanë garantuar mbështetjen e plotë financiare për trajtimin e artistit.

Sipas njoftimit zyrtar, pas informimit të marrë më 7 gusht 2025 nga MEKI, Ministria e Shëndetësisë u vu në kontakt me familjarët e Shundit dhe ofroi mbulimin e të gjitha shpenzimeve mjekësore të nevojshme. Pas biopsisë, kur u konstatua nevoja për trajtim të mëtejshëm, Ministria rikonfirmoi gatishmërinë për të vazhduar mbështetjen.

Aktualisht, Naun Shundi pritet të rikthehet në Shqipëri, ku do të vijojë trajtimin pranë Qendrës së Specializuar në QSUT. Figurë e respektuar e skenës shqiptare, Shundi ka dhënë kontribute të shumta në teatër dhe dramaturgji, duke krijuar një hapësirë të veçantë kulturore përmes teatrit të tij.

Ministritë nënvizojnë se mbrojtja e shëndetit të artistëve dhe përkrahja e kulturës mbeten prioritet i qeverisë.