Agjencia e Mbikëqyrjes Policore ka zbatuar vendimin e Gjykatës së Shkallës së Parë të Juridiksionit të Përgjithshëm në Fier, duke caktuar masat shtrënguese të “Ndalimit për të dalë jashtë shtetit” dhe “Pezullimit të ushtrimit të një detyre ose shërbimi publik” për Nënkomisarin Taulant Ismailaj. Ai, që ka detyrën e Specialistit në Seksionin e Luftës Kundër Narkotikëve në Drejtorinë e Policisë së Vlorës, akuzohet për veprat penale të “Shpërdorimit të detyrës” dhe “Korrupsionit pasiv të personave që ushtrojnë funksione publike”.

Hetimet kanë treguar se Ismailaj ka favorizuar shpërndarës të lëndëve narkotike duke mos i arrestuar, madje në rastet e flagrancës nga Policia e Shtetit. Ky veprim i tij ka ngritur dyshime të forta lidhur me përdorimin e pozitës së tij zyrtare për përfitime të paligjshme dhe sjellje joetike në detyrë.

Njoftimi i AMP:

Fier – Agjencia e Mbikëqyrjes Policore (Rajoni Fier – Berat) ka ekzekutuar vendimin e Gjykatës së Shkallës së Parë të Juridiksionit të Përgjithshëm Fier, e cila ka caktuar masën shtrënguese “Ndalim për të dalë jashtë shtetit” dhe masën ndaluese “Pezullim i ushtrimit të një detyre a shërbimi publik” për Nënkomisar T.I., me detyrë Specialist i Seksionit të Luftës Kundër Narkotikëve në DVP Fier, i dyshuar për veprat penale “Shpërdorim detyre” dhe “Korrupsion pasiv i personave që ushtrojnë funksione publike”.

Nga hetimet rezulton se Nënkomisari ka kryer veprimtari kriminale në dëm të interesave të shtetit. Ai dyshohet se ka favorizuar shpërndarës të lëndëve narkotike duke mos i arrestuar, në rastet e flagrancës nga Policia e Shtetit.