Një 55-vjeçare, e shpallur në kërkim dhe e dënuar me 7 vite burgim për veprën penale “Shfrytëzimi për prostitucion”, është ndaluar nga Policia Kufitare Kapshticë. Vendimi i Gjykatës së Fierit për dënimin me burg 7 vjet është zbatuar për banoren e Patosit. Në të njëjtën kohë, 5 shtetas të tjerë po procedohen në gjendje të lirë për vepra të ndryshme penale. Autoritetet vazhdojnë punën e tyre për zbatimin e ligjit dhe drejtësisë në këtë rast.
Njoftimi i policisë:
Qarku Korçë/Ndalohet një shtetase dhe procedohen në gjendje të lirë 5 të tjerë, për vepra të ndryshme penale.
✅E dënuar me 7 vjet burgim, për shfrytëzim për prostitucion, në rrethana rënduese, ndalohet në PKK Kapshticë, 55-vjeçarja e shpallur në kërkim.
Shërbimet e Stacionit të Policisë Kufitare Kapshticë, në hyrje të Republikës së Shqipërisë, ndaluan shtetasen e shpallur në kërkim Fëllëzë Saliaj, 55 vjeçe, banuese në Patos.
Gjykata e Apelit e Vlorës ka lënë në fuqi vendimin e Gjykatës së Fierit për dënimin e kësaj shtetaseje, me 7 vjet burgim, për veprën penale “Shfrytëzimi për prostitucion”, në rrethana rënduese. Në vitin 2005, shtetasja Fëllëzë Saliaj ka shfrytëzuar për prostitucion, një shtetase tjetër.
Veprimet e mëtejshme procedurale u kryen nga Drejtoria Vendore e Policisë Fier.
-Specialistët për Hetimin e Krimeve të Komisariatit të Policisë Pogradec referuan materialet në Prokurori ku filloi procedimi në gjendje të lirë për shtetasit E. L., 24 vjeç dhe E. L., 25 vjeç, vëllezër, të dy banues në fshatin Grunjas, pasi dyshohet se për motive të dobëta, kanë kanosur dhe kanë goditur me grushte, një 52-vjeçar.
-Specialistët për Hetimin e Krimeve Ekonomiko-Financiare të DVP Korçë referuan materialet në Prokurori ku filloi procedimi në gjendje të lirë për shtetasin E. K., 61 vjeç, banues në Korçë, pasi në lagjen nr. 7, u kap duke kryer këmbim valutor, pa licencën përkatëse. Gjatë kontrollit fizik, shtetasit E. K. iu gjetën shuma të konsiderueshme parash, të valutave të ndryshme, të cilat u sekuestruan në cilësinë e provës materiale.
-Specialistët e Seksionit për Hetimin e Krimeve të komisariateve të Policisë Maliq dhe Korçë referuan materialet në Prokurori ku filloi procedimi në gjendje të lirë për shtetasit F. D., 42 vjeç, banues në fshatin Lozhan, Maliq dhe Xh. M., 25 vjeç, banues në Korçë, pasi u kapën respektivisht në vendin të quajtur “Tyrbja e Gocës”, Maliq dhe në fshatin Pulahë, Korçë, duke transportuar me automjete, sasi drush për zjarr, të prerë në mënyrë të kundërligjshme. Sasitë e druve u sekuestruan në cilësinë e provës materiale, bashkë me automjetet.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
