Regjisori i njohur Jean-Marc Vallée – i cili drejtoi dramën e vitit 2013 “Dallas Buyers Club” – ndërroi jetë të dielën në Quebec City, Kanada, në moshën 58-vjeçare. Lajmin e konfirmoi për CNN publicisti i kompanisë së tij të prodhimit.
Regjisori filloi të punojë në videoklipe kanadeze dhe filma me metrazhe të shkurtra, përpara se të bënte debutimin e tij artistik me filmin në gjuhën franceze “Liste noire”, i njohur gjithashtu me titullin e tij në anglisht “Black List”.
Filmi tjetër shumë i njohur i tij ishte “Dallas Buyers Club”, filmi i vitit 2013 i bazuar në historinë e vërtetë të një pacienti me SIDA, i cili bëhet distributor i trajtimeve eksperimentale. Megjithëse regjia e Vallée nuk u njoh nga Akademia, filmi u nominua për Filmin më të Mirë, ndërsa yjet Matthew McConaughey dhe Jared Leto fituan të dy Oscars për interpretimet e tyre.
Vallée hyri në prodhimin televiziv në vitin 2017 si producent ekzekutiv i dramës HBO, “Big Little Lies”. Ai gjithashtu drejtoi të gjithë sezonin e parë të serialit, duke fituar një Emmy. Më vonë Vallée prodhoi serialin “Sharp Objects”, gjithashtu për HBO, dhe drejtoi çdo episod. Vallée dhe Ross kishin nënshkruar një marrëveshje të re me HBO në prill, sipas Deadline.
Vallée tha në një video të vitit 2019 për The Hollywood Reporter se ishte shumë i kujdesshëm në përzgjedhjen e projekteve që ishte i gatshëm të merrte.
