Aktori amerikan Eric Dane, i njohur për rolet e tij në serialet Grey’s Anatomy dhe Euphoria, ka ndërruar jetë në moshën 53-vjeçare.

Ai u nda nga jeta pas një beteje me Sklerozën Laterale Amiotrofike (ALS), një sëmundje neurodegjenerative që prek qelizat nervore përgjegjëse për lëvizjen e muskujve dhe njihet gjithashtu si sëmundja e Lou Gehrig.

Sipas deklaratës së familjes, Dane kaloi ditët e fundit i rrethuar nga bashkëshortja e tij, Rebecca Gayheart, dhe dy vajzat e tyre, Billie dhe Georgia. Pas diagnostikimit në vitin 2025, ai u përfshi në nisma për rritjen e ndërgjegjësimit dhe mbështetjen e kërkimeve shkencore për këtë sëmundje, për të cilën ende nuk ekziston një kurë.

Eric Dane u bë i famshëm në mbarë botën me rolin e Dr. Mark Sloan, i njohur si “McSteamy”, në “Grey’s Anatomy”, ku ishte pjesë e serialit nga sezoni i tretë deri në të nëntin dhe u rikthye sërish në sezonin e 17-të. Më vonë, ai interpretoi personazhin e Cal Jacobs në “Euphoria”, duke fituar vlerësime për performancën e tij dramatike.

Gjatë karrierës së tij, që nisi në fillim të viteve ’90, ai luajti edhe në filma si X-Men: The Last Stand, Marley & Me dhe Burlesque.

Edhe pas shpalljes së diagnozës, Dane mbeti aktiv profesionalisht dhe vazhdoi të kërkonte mbështetje për kërkimet mbi sëmundjet neurodegjenerative. Në intervistat e tij të fundit, ai shprehej se dëshironte të kalonte sa më shumë kohë me familjen dhe të punonte për aq kohë sa do të kishte mundësi, duke theksuar vendosmërinë për të luftuar deri në fund.