Një natë e tensionuar është regjistruar mes qyteteve Albano Laziale, Ardea dhe Aprilia në Itali, ku një ndjekje e shkurtër por dramatike përfundoi me arrestimin e një motoristi dhe sekuestrimin e një sasie të konsiderueshme droge dhe parash të gatshme.

Ngjarja nisi kur karabinierët e stacionit të Cecchinas i dhanë shenjë ndalimi një motoristi që po lëvizte me shpejtësi të lartë në rrugën Nettunense. Në vend që të ndalte, i riu tentoi të largohej me shpejtësi, duke shkaktuar një ndjekje dramatike prej rreth 4 kilometrash, e cila përfundoi me kapjen e tij nga forcat e rendit.

Gjatë kontrollit të mjetit, karabinierët gjetën 24.800 euro të fshehura në ndarjen e bagazhit të motorit, para të cilat dyshohet të kenë origjinë nga veprimtari kriminale. Hetimet vijuan më tej në banesat e të ndaluarit në qytetet Aprilia dhe Ardea.

Në banesën e Aprilias u sekuestruan 52 kilogramë drogë, përkatësisht 45.7 kilogram hashash dhe mbi 6 kilogram marijuanë. Në banesën tjetër në Ardea, policia gjeti 72.500 euro të tjera në para të gatshme si dhe shënime me dorë që lidhen me rrjetin e shpërndarjes së lëndëve narkotike.

Në përfundim të operacionit, i riu u arrestua dhe u dërgua në burgun e Velletrit, ndërsa hetimet vazhdojnë për të zbuluar bashkëpunëtorët dhe rrjetin që fshihej pas aktivitetit të tij kriminal.