Kryeministri Edi Rama, në përfundim të fjalës së tij në Kongresin Zgjedhor të PS-së, ka njoftuar një sërë ndryshimesh të rëndësishme në qeveri. Këto ndryshime përfshijnë lëvizje të mëdha në disa ministri dhe në drejtimin e Grupit Parlamentar Socialist.
Taulant Balla do të largohet nga posti i Ministrit të Brendshëm për të marrë detyrën e Ministrit të Shtetit për Marrëdhëniet me Parlamentin. Në vend të tij, Ervin Hoxha do të marrë drejtimin e Ministrisë së Brendshme.
Gjithashtu, Niko Peleshi është larguar nga posti i Ministrit të Mbrojtjes dhe do të marrë drejtimin e Grupit Parlamentar Socialist, duke zëvendësuar Bledi Çuçin, i cili do të propozohet për postin e nënkryetarit të Parlamentit. Posti i Ministrit të Mbrojtjes do të kalojë te Pirro Vëngu, aktualisht Drejtor i Autoritetit Portual të Durrësit.
Ervin Mete është larguar nga posti i Ministrit të Financave dhe do të zëvendësohet nga Petrit Malaj, i cili mban aktualisht postin e kreut të Agjencisë së Burimeve Natyrore (AKBN).
Lindita Nikolla do të zëvendësohet nga Elisa Spiropali si kryetare e Kuvendit. Emri i Spiropalit është propozuar nga kryeministri Rama, i cili kërkoi mbështetjen e grupit parlamentar socialist për këtë vendim.
Këto janë ndryshimet kryesore të njoftuara:
– Niko Peleshi- Drejtues i Grupit Parlamentar të PS-së
– Taulant Balla- Ministër Shteti për Marrëdhëniet me Parlamentin
– Ervin Hoxha- Ministër i Brendshëm
– Petrit Malaj- Ministër i Financave
– Pirro Vëngu – Ministër i Mbrojtjes
Në fjalën e tij, Rama tha: “Do t’i propozoj Grupit Parlamentar që në një seancë të menjëhershme dhe të posaçme të Kuvendit, t’i japim të gjithë mbështetjen tonë Elisa Spiropalit për të marrë drejtimin e Parlamentit. Do të propozoj që Bledi Çuçi të marrë detyrën e nënkryetarit të Parlamentit, ndërsa Niko Peleshi drejtimin e Grupit Parlamentar Socialist. Propozimet për disa ndryshime në qeveri janë si më poshtë: Ministër Shteti për Marrëdhënien me Parlamentin Taulant Balla, Ministër i Brendshëm Ervin Hoxha, Ministër i Financave Petrit Malaj dhe Ministër i Mbrojtjes Pirro Vëngu.”
Këto ndryshime vijnë në një moment të rëndësishëm për Partinë Socialiste, ndërsa ajo përgatitet për sfidat e ardhshme politike dhe qeveritare.
