Kryeministri Edi Rama, priti këtë të martë në kryeministri sekretaren franceze të Shtetit për Çështjet Europiane, Laurence Bonne.

Gjatë takimit u bë firmosja e marrëveshjes mes Qeverisë Shqiptare dhe Agjencisë Franceze të Zhvillimit për financimin e rrjetit të Ujësjellësit në Durrës.

Në fjalën e tij kryeministri shprehu falënderimet për mbështetjen e qeverisë franceze si në ndihmën e dhënë me ekipet e kërkim shpëtimit gjatë tërmetit, ashtu edhe me fondet e dhëna në konferencën e donatorëve, frut i të cilës është dhe marrëveshja e sotme.

“Gjatë tërmetit u angazhua një forcë franceze kërkim shpëtimi, duke shpëtuar jetë njerëzish në kushte jashtëzakonisht të vështira për ata vetë. Më pas presidenti u angazhua vetë duke e përfshirë Francën në grupin e vendeve që ofruan mbështetje duke dërguar në konferencën e donatorëve të BE-së, Ministrin e Jashtëm.

Ja ku jemi sot që kurorëzojmë një proces të gjatë për ata që kanë pasur pikëpyetje për angazhimin e atyre fondeve, pasi një pjesë e tyre janë future në procesin e zbatimit me procesin e BE për shkollat, kopshtet dhe sitet e trashëgimisë kulturore dhe një pjesë tjetër janë në proces për gjërat e tijera, si peshkimi dhe infrastrukturën e emergjencave civile. Nuk më ngelet gjë vetëm ta falenderoj ministren për Evropën të Francës, e cila ka ardhur jo vetëm këtë por dhe për të shprehur mbështetjen e Francës për transformimet në rajon”, tha Rama.