Nënkryetari i bashkisë së Tiranës, Arbër Mazniku ka marrë pjesë në komisionin për Reformën Territoriale, ku përfaqësues të njësive vendore të qeverisjes po diskutojnë mbi funksionimin e këtyre njësive të qeverisjes me hartën aktuale territoriale.

Ndërkohë që theksoi se menaxhimi financiar kishte qenë i mirë për bashkinë e Tiranës, Mazniku tha se në këtë drejtim bashkimi i Vorës dhe Kamzës me bashkinë e Tiranës do të sillte rezultate edhe më të larta.

“Nëse nuk do ishte bashkuar ajo pjesë me Tiranën ku sot është bërë bulevardi, janë bërë një seri rrugës dhe investimesh, është çuar linjë e posaçme uji, nuk do kishte asnjë shans që një zonë e tillë si Astiri e planifikuar në mënyrë të rrëmujshme nga komuna më parë, të kishte mundësi të zhvillohej dhe përmirësohej. Sot bashkia e Tiranës, duke përfshirë edhe ish komunat, nuk ka më detyrime ndaj palëve të treta dhe nuk ka as borxhe të mbetura. Menaxhimi financiar ka qenë shumë më i shëndetshëm.
Në mënyrë që të funksiononte më mirë menaxhimi i financave, duhej që edhe Vora dhe Kamza të ishin bashkuar me bashkinë e Tiranës”-tha Mazniku.