Të paktën 40 persona, përfshirë civilë dhe ushtarë, kanë humbur jetën gjatë operacionit ushtarak amerikan në Venezuelë që synonte kapjen e presidentit Nicolas Maduro, raporton New York Times.

Sipas gazetës amerikane, një zyrtar i lartë venezuelan, që foli në kushte anonimiteti, ka deklaruar se “të paktën 40 persona, përfshirë civilë dhe ushtarë, u vranë në sulm”. Burimi nuk ka dhënë detaje të mëtejshme mbi identitetin e viktimave apo vendndodhjen e saktë të përplasjeve.

Zyrtarë amerikanë i kanë thënë New York Times se operacioni përfshinte një fushatë të gjerë ajrore, e cila kishte për qëllim neutralizimin e mbrojtjes ajrore të Venezuelës, përpara ndërhyrjes së forcave tokësore. Sipas tyre, më shumë se 150 avionë amerikanë morën pjesë në operacione, duke goditur objektiva të infrastrukturës ushtarake, me synimin për të krijuar kushte të sigurta për transportimin e trupave me helikopter në zonën ku ndodhej Maduro.

Deri në këto momente, nuk ka pasur asnjë konfirmim zyrtar publik nga Shtëpia e Bardhë apo Pentagoni lidhur me numrin e viktimave apo shtrirjen e plotë të operacionit ushtarak.

Zhvillimet në Venezuelë vijojnë të jenë të paqarta dhe të ndjeshme, ndërsa pritet që autoritetet amerikane dhe ato venezueliane të japin reagime zyrtare në orët apo ditët në vijim.