Pas disa shtyrjesh, Bashkimi Evropian ka njoftuar se nga 12 tetori do të hyjë në fuqi “Sistemi i Hyrjes/Daljes” (EES), një mekanizëm i ri elektronik për kontrollin kufitar.

Sipas Komisionit Evropian, sistemi do të zbatohet gradualisht dhe brenda gjashtë muajve të parë të gjithë vendet anëtare duhet ta kenë funksionalizuar plotësisht.

EES do të regjistrojë automatikisht të dhënat e shtetasve të vendeve jo-anëtare që hyjnë në 29 vende të BE-së, përfshirë gjurmët e gishtërinjve dhe imazhet e fytyrës.

Ky sistem synon të shpejtojë procedurat për udhëtarët e rregullt dhe të forcojë sigurinë, duke parandaluar emigracionin e paligjshëm dhe mashtrimin me identitetin.

Zbatimi i tij ishte planifikuar fillimisht për nëntorin e vitit të kaluar, por u shty për shkak të mosgatishmërisë teknike të disa vendeve dhe frikës nga kaosi në pikat kufitare.

Komisioni e cilëson EES si një hap vendimtar drejt një menaxhimi më modern dhe më të sigurt të kufijve në Evropë.