Maliq Marku, 70-vjeçari i dyshuar për vrasjen e fqinjit Shefqet Hasa dhe plagosjen e komshiut Besim Keça në Tiranë, kishte vetëm një javë që ishte kthyer nga Anglia, ku kishte jetuar prej dy vitesh. Pas kthimit, ai kishte lajmëruar autoritetet e ujësjellësit në lidhje me problematikat e kanalizimeve.

Punonjësit e ujësjellësit ishin përfshirë për të adresuar problemet dhe kishin vendosur piketat në zonën e raportuar. Pasi ata largoheshin, viktima Shefqet Hasa dhe i plagosuri Besim Keça kanë shkuar në shtëpinë e Maliq Markut për t’i kërkuar llogari.

Në momentin e konfrontimit, Maliq Marku ka hyrë në shtëpi dhe ka marrë një armë tip pistoletë. Më pas, ai ka qëlluar drejt viktimave, duke shkaktuar vdekjen e Shefqet Hasës, i cili ka marrë 4 plumba, dhe plagosjen e Besim Keçës, i cili ka pësuar 2 plumba. Për fat të mirë, i plagosuri është jashtë rrezikut për jetën.

Ngjarja tragjike ka ndodhur pas një periudhe tensionesh mes familjeve për shkak të çështjeve të kanalizimeve, duke sjellë pasoja të rënda dhe duke tronditur komunitetin lokal në Tiranë. Autoritetet vijojnë hetimet për të sqaruar të gjitha aspektet e kësaj ngjarjeje të dhunshme.