Një i mitur është plagosur rëndë në Durrës pas një përleshjeje mes bashkëmoshatarësh, që ka shpërthyer jashtë ambientit shkollor. Burime nga vendi i ngjarjes bëjnë me dije se nxënësi i gjimnazit “Dom Nikoll Kaçorri” është goditur disa herë me thikë nga bashkëmoshatari i tij dhe ndodhet në gjendje kritike për jetën për shkak të humbjes së gjakut.

Paraprakisht, konflikti ka nisur nga një debat në rrjetet sociale dhe më pas ka vijuar me një përballje brenda shkollës. Pas përfundimit të orarit mësimor, të dy nxënësit janë takuar jashtë shkollës për të “sqaruar” situatën, por takimi degjeneroi në dhunë fizike.

Sipas burimeve, të dy palët kanë shkuar në vendin e takimit të shoqëruar nga disa shokë, dhe fillimisht ka pasur fyerje të ndërsjellta. Situata përshkallëzohet shpejt, duke përfshirë rreth tetë gjimnazistë në dy grupe, ku përdoren mjete të forta, shkopa bejsbolli dhe armë të ftohta.

Drejtoresha e shkollës ka bërë me dije se nuk mund të japë detaje, pasi çështja është nën hetim, ndërkohë që autoritetet po punojnë për zbardhjen e plotë të ngjarjes dhe përcaktimin e përgjegjësive.