Policia e Kurbinit ka reaguar zyrtarisht pas plagosjes së 25-vjeçarit Jurgen Ndreca në Mamurras. Ndreca u plagos me armë zjarri pas një konflikti të çastit, dhe autor i ngjarjes është identifikuar si 21-vjeçari Endri Baçuku, i cili është arrestuar nga forcat e policisë.
Ngjarja ka ndodhur për motive të dobta rreth orës 12:00, dhe viktima aktualisht ndodhet në spital, duke u konfirmuar se është jashtë rrezikut për jetën. Policia ka sekuestruar armën e përdorur si provë materiale.
Njoftimi i policisë thotë:
“Si rezultat u bë kapja e menjëhershme në flagrancë dhe vënia në pranga e shtetasit E. P., 21 vjeç, banues në Mamurras, i cili dyshohet se gjatë një konflikti të çastit, për motive të dobëta, ka plagosur me armë zjarri pistoletë, shtetasin J. N., 25 vjeç, banues në Mamurras. Arma e zjarrit u gjet dhe u sekuestrua nga shërbimet e Policisë.”
Materialet procedurale janë dërguar te Prokuroria pranë Gjykatës së Shkallës së Parë të Juridiksionit të Përgjithshëm Lezhë, për veprime të mëtejshme.
