Një ngjarje e rëndë ka ndodhur në Tiranë, ku një 52-vjeçar ka qëlluar me thikë bashkëshorten e tij. Ngjarja ka ndodhur pas mesnate, rreth orës 02:15, në rrugën “Xhanfize Keko”.

52-vjeçari, Jakup (Arben) Shahu, i dënuar më parë për vrasje, ka qëlluar me thikë në qafë dhe në trup gruan e tij, E. Sh., 46 vjeçe. Ajo është dërguar në spital dhe ndodhet në kujdesin e mjekëve. Policia ka arrestuar Jakup Shahu, dhe grupi hetimor po punon për sqarimin e rrethanave dhe motivit të kësaj ngjarjeje.

Jakup Shahu është dënuar më parë me 13 vite burg për vrasjen e 28-vjeçarit Arjan Mejdani në vitin 2011, për motive xhelozie. Në atë ngjarje, Shahu vrau Mejdani me kallashnikov, ndërsa shoku i tij, Agron Isiu, plagosi dy të tjerë, babain e viktimës, Bujar Mejdani, dhe kunatin e këtij të fundit, Arben Muharremi. Ata tentuan të arratiseshin, por u kapën nga policia pasi u mbaroi karburanti i makinës.

Jakup Shahu kishte një lidhje jashtëmartesore me bashkëshorten e viktimës, Arjan Mejdani. Kjo lidhje fillimisht u zbulua nga bashkëshortja e Shahut. Një javë para ngjarjes, gruaja e të dyshuarit shkoi te lokali i viktimës dhe filloi të debatojë me gruan e Arjan Mejdanit, duke e akuzuar për marrëdhënien jashtëmartesore. Konflikti mes dy bashkëshorteve vazhdoi me fjalë dhe më pas me goditje me sende të forta.

Konflikti përshkallëzoi kur Mejdani shkoi të takonte Jakup Shahu për të konfrontuar atë. Gjatë debatit, bashkëshortja e Shahut rrëfeu historinë e tradhtisë, çka çoi në një konflikt të mëtejshëm. Në lokalin e Shahut, pas debatit, Shahu dhe Isiu nxorën armët dhe qëlluan drejt Mejdani dhe dy të tjerëve, duke lënë Mejdanin të vdekur dhe të tjerët të plagosur.