Ambasadat e Republikës së Kosovës në Berlin, Paris dhe Bruksel kanë nisur zyrtarisht procesin e votimit për zgjedhjet parlamentare të 28 dhjetorit, që do të mbahen në Kosovë. Lajmi është konfirmuar nga vetë përfaqësitë diplomatike përmes njoftimeve në rrjetet sociale, ku bëhet e ditur se votimi ka filluar që në orën 07:00 të mëngjesit.

Procesi i votimit jashtë vendit ka nisur njëkohësisht në 29 përfaqësi diplomatike të Kosovës, të shpërndara në 18 shtete të ndryshme të botës. Shtetasit e Republikës së Kosovës që janë regjistruar paraprakisht për votim në ambasada dhe misione diplomatike kanë filluar tashmë të hedhin votat e tyre. Sipas të dhënave zyrtare, në këtë proces zgjedhor kanë të drejtë vote mbi 19.187 qytetarë të regjistruar në diasporë.

Ambasada e Kosovës në Bruksel njoftoi se votimi ka nisur pa probleme, duke theksuar rëndësinë e pjesëmarrjes qytetare në procesin demokratik.
“Shtetasit e Republikës së Kosovës, të regjistruar për votim në Ambasadën tonë në Bruksel, kanë filluar tashmë të hedhin votat! Votimi jashtë Kosovës për zgjedhjet e parakohshme parlamentare të 28 dhjetorit 2025 ka nisur këtë mëngjes nëpër ambasadat dhe misionet e Republikës së Kosovës në mbarë botën. Demokracia në veprim, çdo votë çon peshë!”, thuhet në njoftimin e ambasadës.

Edhe Ambasada e Kosovës në Berlin ka konfirmuar nisjen e procesit të votimit, duke sqaruar se qendrat e votimit do të jenë të hapura nga ora 07:00 deri në orën 19:00. Përfaqësia diplomatike u ka bërë thirrje të gjithë votuesve të regjistruar që të marrin pjesë në votim dhe të shfrytëzojnë të drejtën e tyre kushtetuese.

“Në Ambasadën e Republikës së Kosovës në Berlin, procesi i votimit ka filluar në orën 07:00 dhe do të zgjasë deri në orën 19:00. Ftojmë të gjithë votuesit e regjistruar me sukses që të marrin pjesë në votim, duke shfrytëzuar të drejtën e tyre për të votuar”, njofton ambasada.
Sipas rregullave të përcaktuara nga Komisioni Qendror i Zgjedhjeve, çdo votues duhet të jetë i regjistruar për votim në misionet diplomatike dhe konsullore të Republikës së Kosovës dhe të posedojë një dokument identifikimi të vlefshëm, si letërnjoftim, pasaportë ose patentë shoferi të Kosovës.

Votimi i diasporës konsiderohet një pjesë e rëndësishme e procesit zgjedhor, duke reflektuar përfshirjen e qytetarëve që jetojnë jashtë vendit në vendimmarrjen politike të Kosovës, në prag të zgjedhjeve parlamentare të 28 dhjetorit.