Anëtarë të kryesisë së FRPD-së, nisin mbledhjen e firmave për të çuar në referendum të brendshëm,  largimin e Sali Berishës nga grupi parlamentar i Partisë Demokratike.

Kryesia e Forumit Rinor të PD, i është drejtuar me një kërkesë peticion Serketarit të Përgjithshëm Gazmend Bardhi, kryetarit të Këshillit Kombëtar Edi Paloka dhe Kryesisë së PD, për vendimin e kryetarit Lulzim Basha për përjashtimin nga grupi parlamentar të deputetit Sali Berisha.

“Po ju drejtohemi nëpërmjet këtij peticioni lidhur me situatën e paprecedentë të krijuar nga vendimi personal i Kryetarit të Partisë Demokratike për përjashtimin nga grupi parlamentar i Profesor Doktor Sali Berisha.

Duke e konsideruar këtë veprim në shkelje të plotë të statutit, parimeve, vlerave të Partisë Demokratike si dhe rrezikun që mbart për përcarjen e thellë dhe të parikuperueshme të saj kërkojmë që ky veprim t’i nënshtrohet me domosdoshmëri një referendumi në anëtarësinë e partisë si të vetmen rrugë për të ruajtur unitetin e Partisë Demokratike të Shqipërisë.”- thuhet ne letren qe mban firmat e FRPD.