Ministria e Bujqësisë dhe Zhvillimit Rural, në bashkëpunim me donatorët, po fillon një nismë që synon të nxisë dhe mbështesë zhvillimin e sektorit të blegtorisë në Shqipëri, duke e konsideruar atë si një nga sektorët më të rëndësishëm të ekonomisë rurale. Nisma më e re, në bashkëpunim me GIZ Albania dhe me mbështetjen e Qeverisë Gjermane dhe Zvicerane, ka të bëjë me ofrimin e një praktike pune 4-mujore në blegtori, me synimin e përfshirjes së të rinjve dhe të reja të apasionuar pas këtij profesioni dhe prodhimtarisë së qumështit.

Eksperienca do të ofrohet në fermat familjare zvicerane dhe do të fokusohet në praktikat më të mira të ushqyerjes, mjeljes, higjienës dhe aspekte të tjera të prodhimit të qumështit. Aplikimet janë të hapura për të rinjtë me moshat 18-29 vjeç. Përparësi do të jepet të rinjve nga fermat familjare shqiptare që merren me prodhimin e qumështit, por edhe nxënësve dhe studentëve të shkollave të mesme/larta bujqësore. Ky program ofron një mundësi unike për të pasur një eksperiencë praktike dhe për të ndjekur praktikat më të mira në blegtori, duke kontribuar në përmirësimin dhe zhvillimin e sektorit blegtor në Shqipëri.