Kur flitet për Kupën e Botës 2026, Sylvinho pritet të jetë i vetmi trajner brazilian në pankinën e një kombëtareje europiane, në një kontrast të fortë simbolik me Brazilin, që drejtohet nga Carlo Ancelotti. Ky fakt ka tërhequr vëmendje edhe në Brazil, ku futbolli shihet si pjesë e identitetit kombëtar dhe ku rrugëtimi i trajnerit të Shqipërisë po ndiqet me interes të veçantë.

Në një intervistë ekskluzive për podcast-in e ESPN Brasil, trajneri i Kombëtares shqiptare ka folur hapur për objektivat e ekipit, rrugën drejt Botërorit 2026 dhe shansin historik që Shqipëria ka për të siguruar një vend në turneun më të madh të futbollit botëror.

“Ky është një moment shumë i rëndësishëm për ekipin dhe për të gjithë vendin. Që nga Europiani kemi pasur shorte të forta, por sfidat janë pjesë e rrugës që duhet për të arritur objektivat”, u shpreh Sylvinho. Ai theksoi se stafi teknik po përgatitet me kujdes për fazën vendimtare, duke shtuar: “Nga janari do të monitorojmë më nga afër lojtarët tanë dhe do të jemi të pranishëm në disa ndeshje për të ndjekur performancat e tyre.”

Kuqezinjtë do të përballen me Poloninë më 26 mars në Varshavë, në gjysmëfinalen e “playoff”-it për kualifikimin në Kupën e Botës 2026. Një fitore do ta çonte Shqipërinë një hap larg ëndrrës, drejt finales vendimtare të 31 marsit, ku do të përballet me fituesin e çiftit Ukrainë–Suedi.

Duke folur për përballjen ndaj Polonisë, Sylvinho nënvizoi se në këtë nivel nuk ka favoritë të qartë dhe se gjithçka vendoset nga detajet. “Poloninë e njohim mirë, kemi luajtur me ta kohët e fundit. Kanë ndërruar trajner, por lojtarët mbeten të njëjtë dhe të cilësisë së lartë. Ata janë në fazë rindërtimi, ndërsa ne po kalojmë një periudhë zhvillimi. Nuk ka avantazh të dukshëm, gjithçka mund të ndryshojë brenda 90 minutash”, tha trajneri brazilian.

Në mbyllje, Sylvinho shprehu besim të plotë te grupi i lojtarëve dhe puna e bërë deri tani. “Lojtarët tanë janë mësuar me sfida të forta. Do të mbështetemi te cilësitë tona dhe te puna që kemi bërë deri tani.”

Një sfidë e madhe, një skenë vendimtare dhe një mundësi historike për futbollin shqiptar. Rruga drejt Botërorit 2026 kalon nga Varshava, aty ku çdo detaj pritet të jetë vendimtar.