Një video e rëndë ka zbuluar një skandal të torturimit dhe eksperimentimit me kafshët në Shtetet e Bashkuara të Amerikës.

Laboratori Inovac INC është i vendosur në shtetin e Indianës, ndërsa brenda tij ka depërtuar një anëtar i grupit në mbrojtje të të drejtave të kafshëve, “Humane society”.

Videoja e cila tashmë është bërë virale, tregon disa qen në dukje këlyshë dhe majunë që mbahen na kafaze dhe u nënshtrohen eksperimenteve të ndryshme, ku testohet toksiciteti i lëndëve narkotike. Eksperimentet janë porositur nga 12 kompani farmaceutike në SHBA.

Kafshët ushqehen me detyrim me droga dhe ilaçe shumë të fortë e të dëmshëm që në shumë raste shkaktojnë dhe ngordhjen e tyre. Edhe nëse kafshët nuk ngordhin nga ilaçet, sërish ato vriten për të vrojtuar më mirë efektet që këto barna japin në trupin e tyre.

Pamja më e rëndë e siguruar ishte momenti kur një qen ushqehet me ilaçe me anë të një tubi, dhe më pas lëshohet sërish në kafazin e tij. Kafsha e gjorë dridhet dhe lëviz disa herë duke treguar dhimbjet, teksa në fund bie në dysheme i ngordhur.

Pas publikimit të videos vetë laboratori ka reaguar duke argumentuar se eksperimentet e tyre janë në të mirë të njerëzimit dhe se duhet kuptuar potenciali i plotë i shkencës.