Pas krimit të rëndë që tronditi një komunitet të tërë, familja e Selim Velsulës është në kërkim të drejtësisë së plotë. Vajza e viktimës, në një deklaratë të fortë për gazetarin Enver Doçi, ka kërkuar dënimin maksimal për autorin e vrasjes, kushëririn e babait të saj, duke theksuar se nuk e falin gjakun dhe se do të shkojnë deri në fund të kësaj çështjeje.

“Ai nuk është në depresion. Ka ardhur me vetëdije, i përgatitur nga Tirana. Im atë ishte duke kullotur bagëtitë. E ka tërhequr zvarrë, e ka lënë shuk aty dhe është larguar. Nuk e falim kurrë gjakun, të dënohet me burgim të përjetshëm, përndryshe ne do ta marrim vetë në dorë këtë punë,” u shpreh vajza e Selim Velsulës me emocion të thellë dhe vendosmëri.

Ndërkohë, bashkëshortja e viktimës kujtoi momentin kur mori lajmin tragjik.
“Kishte ikur në mëngjes të çonte bagëtitë, u kthye, hëngri bukë dhe mori kalin për të shkuar për dru. Më erdhi një djalë e më tha: ‘Kanë vrarë Selimin’. Nuk e besoja, i thashë: ‘Jo, ai është me lopë, kush e vrau aty në mes të livadhit?’ Nuk kishte asnjë konflikt me njeri.”

Krimi ka lënë të shokuar familjarët dhe komunitetin, ndërsa thirrjet për drejtësi nuk mungojnë. Familja e viktimës e ka bërë të qartë se nuk do të ketë qetësi për ta pa u dhënë një ndëshkim i plotë për autorin e vrasjes.