Një operacion i gjerë i Karabinierëve të Brescias ka çuar në arrestimin e tetë personave, mes tyre një oficer policie dhe një shtetas shqiptar, të akuzuar për një sërë veprash penale, përfshirë trafik droge, falsifikim dokumentesh, armëmbajtje pa leje, tentativë vrasjeje dhe komplot kriminal.

Sipas Prokurorisë së Brescias, hetimet që zgjatën më shumë se një vit zbuluan një strukturë të mirëorganizuar kriminale që operonte në disa rajone të Italisë së Veriut. Katër nga të arrestuarit janë dërguar në burg, ndërsa katër të tjerë ndodhen në arrest shtëpiak.

Në qendër të hetimeve është një sulm mafioz i ndodhur më 1 mars 2024 në Montichiari, ku një biznesmen italian u qëllua tetë herë nga persona të maskuar. Edhe pse i mbijetoi atentatit, ai humbi jetën disa muaj më vonë për shkaqe të tjera. Autoritetet dyshojnë se autori i sulmit ishte një shqiptar me precedent penal, ndërsa oficeri i policisë nga Desenzano rezulton organizatori kryesor i rrjetit.

Hetimet zbuluan gjithashtu dy struktura të tjera kriminale të përfshira në falsifikime tatimore dhe evazion fiskal, me fatura fiktive që kapnin vlerën e mbi 450 mijë eurove. Oficeri i policisë dyshohet se ka përdorur kompani fantazmë në sektorin e ndërtimit për të pastruar paratë e drogës.

Operacioni u shtri në shtatë provinca italiane – Brescia, Milano, Bergamo, Verona, Mantova, Ferrara dhe Rovigo – dhe përfshiu njësi speciale teknologjike dhe qen të trajnuar për zbulimin e parave.

Autoritetet italiane nuk përjashtojnë që rrjeti të ketë lidhje ndërkombëtare, përfshirë kontakte me trafikantë nga Ballkani dhe Afrika e Veriut.