Operacioni në kuadër të asgjësimit të parcelave me kanabis në qarkun e Shkodrës vijon me intensitet. Policia e Shkodrës ka njoftuar se gjatë kësaj jave janë asgjësuar 3459 bimë kanabisi.
Në kuadër të operacionit, një 66-vjeçar me inicialet N. Q., dhe djali i tij 17-vjeçar janë shpallur në kërkim, pasi në oborrin dhe në afërsi të banesës së tyre janë gjetur dhe sekuestruar 8 kilogramë e 256 gramë kanabis në formë boçeje.
Njoftimi i policisë është si më poshtë:
“Në zbatim të masave të përcaktuara në planin operacional kombëtar ‘Territor i pastër’, për parandalimin, evidentimin dhe goditjen e kultivimit të bimëve narkotike, si dhe në vijim të goditjeve të njëpasnjëshme ndaj kësaj veprimtarie kriminale, Drejtoria Vendore e Policisë Shkodër dhe komisariatet në varësi të saj, kanë vijuar intensivisht kontrollet në terrene shumë të vështira malore në të gjithë territorin e qarkut.
Gjatë kontrolleve, bazuar në pamjet filmike të siguruara gjatë monitorimeve me dron si dhe në inteligjencën policore, u bë e mundur asgjësimi i 3459 bimëve narkotike kanabis dhe sekuestrimi i një sasi prej 8.256 kg kanabis në formë boceje.
Konkretisht, në fshatin Kasnec gjatë kontrollit të territorit në oborr dhe në afërsi të banesës së shtetasit N. Q., 66 vjeç, u gjetën dhe sekuestruan në cilësinë e provës materiale 8.265 kg lëndë e thatë e dyshuar narkotike kanabis sattiva në formë boceje.
Për këtë rast, Specialistët e Sektorit për Hetimin e Narkotikëve në DVP Shkodër shpallën në kërkim shtetasin 66-vjeçar dhe djalin e tij 17-vjeçar.
Nga shërbimet e Komisariatit të Policisë Shkodër u asgjësuan në territoret e njësive administrative Pult, Shosh dhe Postribë, 1160 bimë të tjera kanabis;
Në Malësinë e Madhe u asgjësuan në territorin e njësisë administrative Kelmend, 691 bimë kanabisi;
Ndërsa në Vaun e Dejës u asgjësuan në territorin e njësisë administrative Shllak, 1608 bimë kanabis;
Vijon puna për identifikimin, kapjen dhe nxjerrjen përpara përgjegjësisë penale të autorëve të kultivimit të këtyre bimëve narkotike.”
