Një shqiptar është arrestuar në Belgjikë si pjesë e një operacioni të policisë në qytetin e Antëerp, ku janë kapur gjithsej pesë persona, përfshirë katër shtetas belgë. Ky aksion antidrogë çoi në sekuestrimin e një sasie të madhe kokaine, 672 kilogramë, që ishte fshehur në një kontejner që transportonte kafe me origjinë nga Kolumbia. Droga ishte e fshehur në çanta sportive, të cilat ishin mbështjellë me fletë metalike për t’u fshehur nga autoritetet.

Operacioni është zhvilluar pas një hetimi të gjerë që kishte filluar në muajin qershor, kur policia kreu disa kontrolle në shtëpi dhe gjeti informacione që çuan në identifikimin e një rrjeti kriminal të trafikimit të lëndëve narkotike. Hetimi çoi në identifikimin e një 29-vjeçari dhe më pas në hapjen e një hetimi të ri që synonte goditjen e këtij rrjeti. Ndaj të arrestuarve janë ngritur akuza për trafik narkotikësh dhe bashkëpunim në këtë veprimtari kriminale.